திருவள்ளுவரைப் போற்றி இலக்குவனாரின் கனவை நனவாக்குவோம்!

இலக்குவனார் திருவள்ளுவன்      06 September 2015      No Comment

திருவள்ளுவரைப் போற்றி

இலக்குவனாரின் கனவை நனவாக்குவோம்!

தமிழ்ப்போராளி பேராசிரியர் முனைவர் சி.இலக்குவனார் தொல்காப்பியம், சங்க இலக்கியம், குறள்நெறி ஆகியவற்றைப் பரப்புவதையும் தமிழ்க்காப்புப் பணிகளையும் தம் வாணாள் தொண்டாகக் கருதிப் பாடுபட்டவர்; தம் மாணவப்பருவத்தில் இருந்தே இப்பரப்புரைப் பணிகளிலும் காப்புப் பணிகளிலும் ஈடுபட்டவர்; தாம் பணியாற்றிய இடங்களில் எல்லாம் திருவள்ளுவருக்கு விழாக்கள் எடுத்தும் திருக்குறள் வகுப்பு நடத்தியும் குறள்நெறி பரப்பிய சான்றோர்; குறள்நெறி முதலான இதழ்கள் மூலமும் திருவள்ளுவர் புகழ் போற்றிய ஆன்றோர்.

  “இன்றைய சூழ்நிலையில் மக்கள் அமைதிவாழ்வு பெறவும், பசி, பிணியற்று இன்புற்று வாழ்வும் அவர்களுக்கு வழிகாட்டுவதே இன்றியமையாத பணியாகும்” என்னும் பேராசிரியர் சி. இலக்குவனா், அனைவருக்கும் குறள்வழியைக் காட்டுவதே சிறந்த பணி என்கின்றார். திருக்குறளை ஏன் போன்ற வேண்டும் என்பதற்கு அவர் பின்வருமாறு ‘குறள்நெறி’ இதழில் விளக்குகிறார்:-

  திருவள்ளுவர் தமிழ்நாட்டில் பிறந்திருந்தாலும், திருக்குறளைத் தமிழில் இயற்றியிருந்தாலும் அவர் அந்நூலைச் செய்தது உலகத்திற்காகவே ஆகும் அதன் காரணமாக அது உலகப் பொதுமறை என்று அழைக்கப்படுகிறது.

   வள்ளுவர் தமிழகத்தில் தோன்றி தமிழில் எழுதியிருந்தாலும், தமிழர்களாகிய நாம் இன்னும் அதனுடைய நுட்பங்களை உணர்ந்து அதன்படி வாழ்க்கையை அமைத்துக் கொள்ளவில்லை. தமிழர்கள் இன்னும் அதனை நல்ல முறையில் விளங்கிக் கொள்ளாததால் தான் தமிழ்ப்பற்று இல்லாதவர்களும் தமிழ்ப் பகைவர்களும், மக்கள் பகைவர்களும் அதனை இழித்தும் பழித்தும் கூறியும் அதனால் பெருமை பெற்றும் வருகிறார்கள். தமிழர்களாகிய நாம் அதன் நெறிகளைக் கடைப்பிடித்து வந்தால் நாடும், நாமும், நம்மைச் சேர்ந்தவர்களும் சேராதவர்களும் நன்மை அடையத் துணைபுரியும்.

   குறள் நெறி என்பது வள்ளுவர் நெறி. குறள் என்ற சொல்லுக்கு இன்று சிலருக்கு – ஏன் உயர்ந்த சமயத் தலைவர்களுக்குக் கூட – உண்மையான பொருள் தெரியவில்லை. அவ்வாறு அறிந்து கொள்ளாமல் – குறளைக்கும் குறளுக்கும் பொருள் புரியாமல் – குறள் என்பது கோள் சொல்லக்கூடியது என்று கருதி மக்களிடத்தில் உரைத்தும் வருகிறார்கள்.

  மன்பதையில் சாதிப்பாகுபாடும், அரசியல் கட்சிகள் பாகுபாடும் வலிமை பெற்று நிற்கின்றன. பாகுபாடுகள், வேற்றுமைகள் அனைத்தும் மறைந்து எல்லோரும் இன்புற்று வாழ வேண்டுமானால் மக்கள் அனைவரும் குறள்நெறியைத் தம்முடைய வாழ்க்கை நெறியாகக் கொள்ள வேண்டும்.

குறள்நெறிதான் நம் வாழ்க்கை நெறி என்பதை மக்கள் உணர வேண்டும் அல்லவா? அதை எடுத்துரைக்க வேண்டியது ஆன்றோர்கள் கடமை அல்லவா? அதற்கு ஓர் எளிய வழியாகத்தான் திருவள்ளுவர் நினைவைப் பலவகைகளிலும் போற்ற வேண்டும் என்கிறார் பேராசிரியர் இலக்குவனார். திருவள்ளுவர் ஈராயிரம் ஆண்டு வருவதற்கு முன்னரே தொலைநோக்குப் பார்வையுடன் இது குறித்துச் சிந்தித்தார் அவர். திருவள்ளுவர் ஈராயிரம் ஆண்டினைப் பல்வகைகளிலும் சிறப்பாகக்கொண்டாடுவதன் மூலம் திருவள்ளுவர் புகழ் பரப்பித் திருக்குறள் நெறியை உலக மக்கள் பின்பற்றச் செய்யலாம் என நம்பினார். அதற்காகவே, பேராசிரியர் சி.இலக்குவனார் அவர்கள் திருவள்ளுவர் ஈராயிரம் ஆண்டினைச் சிறப்பாக நாம் கொண்டாட வேண்டும் என அதற்கு ஐந்து ஆண்டுகளுக்கு முன்பே வேண்டுகோள் விடுத்தார். நாம் எவ்வாறு திருவள்ளுவர் நினைவைப் போற்ற வேண்டும் என்றும் அவர் குறிப்பிட்டார்.

அவ் வேண்டுகோள்கள் வருமாறு:-

திருவள்ளுவர் நினைவாண்டு

கி.பி. 1969 சனவரித் திங்கள் பதினான்காம் நாள் (தை முதல் நாள்) திருவள்ளுவர் தோன்றி இரண்டாயிரம் ஆண்டு நிறைவுறுகிறது. ஆதலின் அந்தத் தை முதல் அடுத்த தை வரை (1969 முழுவதும்) திருவள்ளுவர் நினைவு ஆண்டாகவே கருதப்பட வேண்டும். உலகப் பொதுமறை அருளிய திருவள்ளுவர் நினைவாகப் பின்வரும் செயல்களை மேற்கொள்ளுதல் வேண்டும்.

 1.    இந்த ஆண்டில் பிறக்கும் ஆண்குழந்தைகட்குத் திருவள்ளுவர் என்றும் பெண் குழந்தைகட்குத் தமிழ் மறைச் செல்வி என்றும் பெயர் இடுதல் வேண்டும்.
 2.    திருவள்ளுவர் நினைவாக ஆங்காங்கு நினைவுச் சொற்பொழிவுகளும் கலை நிகழ்ச்சிகளும் நிகழ்த்த வேண்டும்.
 3.    ஒவ்வொரு நாளும் அவரவர் கடமைகளைத் தொடங்குவதற்கு முன்பு திருக்குறளில் ஒவ்வோர் அதிகாரத்தைப் படித்துவிட்டே தொடங்கல்  வேண்டும்.
 4.    நாம் எழுதும் கடிதங்களில் ஏதேனும் ஒரு திருக்குறளை எழுதிவிட்டே கடிதங்களைத் தொடங்க வேண்டும்.
 5.    நாம் பிறரைச் சந்தித்து வணக்கம் தெரிவிக்கும் போது ‘வள்ளுவர் வணக்கம்’ என்று கூற வேண்டும்.
 6.    ‘திருக்குறளில் கூறியுள்ளவாறே வாழ்வோம்‘ என்று நாள்தோறும் உறுதிமொழி எடுத்துக் கொண்டு வள்ளுவர் நெறியில் வாழ்தல் வேண்டும்.
 7.    எந்த நிகழ்ச்சியைத் தொடங்கினாலும் கல்வி நிலையங்களிலும் பொதுவிடங்களிலும் வள்ளுவருக்கு வணக்கம் கூறி வள்ளுவர் நெறியில் வாழ்வோம் என்று உறுதி கூறித் தொடங்குதல் வேண்டும்.
 8.    திருவள்ளுவர் பெயரால் அறப்பணிக்குழு ஒன்றை அமைத்து வையகமெங்கும் தமிழர் நெறியைப் பரப்ப தமிழக அரசு ஆவன செய்தல் வேண்டும்.
 9.    திருக்குறளில் புலமை பெற்றுள்ள அறிஞர்கட்குப் பட்டங்களும் பரிசுகளும் வழங்குதல் வேண்டும்.
 10. தமிழ்க்கலை, பண்பாடு, வரலாறு ஆகியவற்றை ஆய்வதற்கும் பரப்புவதற்கும் திருவள்ளுவர் பெயரால் பல்கலைக் கழகம் ஒன்று தோற்றுவிக்கப்பட வேண்டும்.
 11.  வள்ளுவர் நெறியை வையகமெங்கும் பரப்பத்தக்க, தமிழக அறிஞர்களை வெளிநாடுகளுக்கு அனுப்ப வேண்டும். வெளிநாட்டுப் பல்கலைக் கழகங்களில் திருவள்ளுவர் பெயரால் தமிழ் ஆராய்ச்சித் துறைகள் அமைக்க வேண்டும்.
 12.   இந்த ஆண்டில் எடுக்கப் பெறும் திரைப்படங்கள் தொடக்கத்தில் திருவள்ளுவர் படத்தையும், சில குறட்பாக்களையும் காண்பித்தல் வேண்டும். கதை நிகழ்ச்சிகளில் ஆங்காங்கு திருக்குறள் கருத்துக்களை மிகுதியாகப் பரப்புதல் வேண்டும்.

இவ்வாறு திருவள்ளுவர் விழாவைக் கொண்டாடி மக்கள் வாழ்வைச் செம்மைப்படுத்த பசி, பிணி, பகை நீங்கி எல்லோரும்  இன்புற்றிருக்கும் நிலையைத் தோற்றுவிப்போமாக!

  ஐம்பது ஆண்டுகளுக்கு முன்னர் பேராசிரியர் இலக்குவனார் விடுத்த வேண்டுகோள்கள் கனவாகவே உள்ளன. இருப்பினும் காலம் இன்னும் இருக்கிறது. இனியேனும் இவற்றை நாம் நிறைவேற்றலாம்!   ‘வாழ்க வளமுடன்’ என அந்த அமைப்பினர் கூறுவதுபோல், நாம் ‘வள்ளுவர் வணக்கம்’ எனக் கூறலாமே! மடல்கள், அழைப்பிதழ்கள் ஆகியவற்றில் திருக்குறளை எழுதிவிட்டுத் தொடங்கலாமே! நம் பிள்ளைகளுக்குத் திருவள்ளுவர் என்றும் தமிழ்மறைச் செல்வி என்றும் பெயர் சூட்டலாமே! குறள்நெறிச் சொற்பொழிவுகள், கலை நிகழ்ச்சிகள் நடத்தலாமே! திரைப்படங்களிலும் தொலைக்காட்சித் தொடர்களிலும் திருவள்ளுவர், திருக்குறளுக்கு இடம் தரலாமே! குறள்நெறி ஆய்வையே முதன்மை நோக்கமாகக் கொண்டு திருவள்ளுவர் திருக்குறள் ஆராய்வுப் பல்கலைக்கழகம் நிறுவலாமே! உலகெங்குமுள்ள பல்கலைக்கழகங்களில் திருக்குறள் துறைகள் ஏற்படுத்தலாமே!

  மேற்குறித்தவாறான ஒவ்வொன்றையும் உலகெங்கும் உள்ள தமிழர்கள் தத்தம் பகுதிகளில் செய்படுத்தத் தொடங்கினால் குறள்நெறிக் காவலர் பேராசிரியர் இலக்குவனார் கண்ட கனவு நனவாகும்! தெய்வப்புலவர் திருவள்ளுவரை உலக மக்கள் நன்கறிவர்! மேற்குறித்த 12 வேண்டுகோள்களையும் திருக்குறள் செம்மல் இலக்குவனார் தந்த கட்டளைகளாக எண்ணி நாம் பின்பற்றுவோம்! குறள் கூறும் மாந்தராக வாழ்வோம்!

இலக்குவனார் வழியில் குறள்நெறி போற்றுவோம்!

குறள்நெறி போற்றிக் குவலயம் காப்போம்!

– இலக்குவனார் திருவள்ளுவன்

(அகரமுதல 95, ஆவணி 20, 2046 / செப். 06, 2015 தொடர்ச்சி)

கவிஞர் முடியரசன்- இ.மறைமலை

மறைமலை இலக்குவனார்      06 September 2015      No Comment

  கனி தமிழ்க் கவிதைபுனைந்த கரங்கள் கயிறு திரிக்கத் தொடங்கிவிட்ட இன்று, மக்கள் வாழ்வாம் கடலியக்கும் சுவைப்பாட்டாம் கண்ணான செந்தமிழைக் கட்டாயத் திணிப்பால் கடுகிவரும் காட்டுமொழியாம் இந்தி அழித்து வரும் இடுக்கண்ணான வேளையிலே, தமிழ் காக்கும் பணியில் ஈடுபட்டுள்ள தலையாய கவிஞர், தன்னுயிரை நல்குதற்கும் தயங்காது மொழிப்போரில் பங்கு கொண்ட பன்னூற்றுக்கணக்கான இளைஞர்கட்குப் பாவின்பம் நல்கிவரும் பாவலர் முடியரனேயாவார் என முட்டின்றிச் சொல்லவியலும். மறைமலையடிகளாரின் மாண்புடைத் தனித்தமிழ் இயக்கத்தைத் தகர்த்தெறிய முற்பட்ட, தீந்தமிழில் திரைக்கவிகளை எழுதித்திரட்டிவிட்ட சில தான்தோன்றிகளைப் போலன்றித், தமிழாலே உயிர் வளர்த்தும் தமிழ்காக்க வகையறியாக் கள்ளதாசர்களைப்போலன்றித், தமிழ்க்கவி உலகிற்குத் தானே தலைவன் எனப் பறையறையும் தம்பட்டங்களைப்போலன்றிக் குடத்திலிட்ட விளக்காகக் குணமென்னும்குன்றேறி நின்ற பான்மையராய் விளங்குகிறார். அவரது மொழிப்பற்று சூழ்நிலை வயத்தால் எழுந்ததன்று; பருவநிலையால் பெருகிவரும் காட்டாறுபோலன்றித் தண்ணென்றொழுக்கம் தழுவிச் செல்லும் வற்றாத ஆறுபோன்று நிலைத்த பான்மையுடையது.

  செந்தமிழ் நாட்டினைத் தந்தையர்நாடெனத் தலைமேல் போற்றி அருந்தமிழ்க் கவிதை விருந்தளித்த பெருங்கவிஞன் பாரதி, குன்றிய தோளுடைய இன்றைய தமிழரின் இழிநிலை போக்கிடத் தமிழியக்கம் கண்ட தனிப்பெருந்தகையோன் பாரதிதாசன் ஆகியோர், விட்டுச்சென்ற பணியைத் தொடர்ந்து நடாத்துபவர், தோற்றம் மறைவிலாத் தொல்தமிழ் இன்று வேற்றவரின் மொழியால் வெதும்பி வாடுவதை ஆற்றாது கனன்றெழுந்து ஊற்றாகப் பெருகிவரும் உணர்வுகளை ஆற்றொழுக்காய் அருந்தமிழில் அமைத்து நயமிக்க கவிதைகளாக நமக்களித்த முடியவரனேயாவார் என்பதற்கு அவரது கவிதைகளே கரி பகரும்.

  அவரது புதுமை நோக்கிற்கு ஒரு சான்று: நிலவு, விண்மீன்கள், தாமரை ஆகியவற்றை ஒரு சேரக்காணின் நடன அரங்கத்திற்கு ஒப்பிடுதல் கம்பர் வழிவந்தோர் மரபு. குலவி சீர்த்தமிழறிஞர் நிலவுதமிழ்ப்பெருமை பரப்ப மேடையேறி நிற்கும்போது, கல்லெறிந்து காயப்படுத்தும் கீழ்மக்கள் நிறைந்த தமிழ்நாட்டுப் பேச்சு மேடையை நினைவுகூர்கிறார் கவிஞர்.

மதியுடையோர் பேசுவதைக் கேட்டல்நன்று

மாண்புவரும் எனக்குழுமும் விண்மீன் கூட்டம்

அதுமகிழ வானத்து மேடைஏறி

அம்புலியார் சொற்பொழிய, முகிலன் ஓடி

எதிரியெனக் கூட்டத்துள் ஒளி மறைத்தான்

இடியிடித்தான்,குழப்பத்தை ஆக்கிவிட்டான்

இதிலென்ன கண்டனனோ? மதியர்நாளை

ஏறாமல் இருப்பாரோ மேடைமீது?

என அழகாகத் தமிழ்நாட்டுப் பேச்சு மேடையைச் சொற்போர் புரிவோருடன் கற்போர் புரிவோரை வருணனை செய்கிறார்.

“இதிலென்ன கண்டனனோ? மதியர்நாளை

ஏறாமல் இருப்பாரோ மேடைமீது?”

என்ற வரிகளில் அங்கதம் ஒலிக்கிறது. கல்லால் அடித்துவிடுவதால் அறிஞர் வாயிலாக வெளிப்படும் உண்மையை மறைத்துவிடல் இயலாது எனும் உண்மையை உணர்த்துகின்றார். இவர் காலத்துக்கேற்ற கவிஞர் எனக்காட்ட  இஃதொன்றே சாலும்.

  இக்காலம் தமிழ்மொழிக்கும் இனத்திற்கும் கேடுகாலமாய் அமைந்துள்ளது. இதனைத் தன் நூல்தோறும் கவிதோறும் உணர்த்துகிறார் கவிஞர். மொழியை வளப்படுத்தும் தனித்தமிழ் இயக்கத்திற்கும் கவிஞரது பாடல்கள் துணை நிற்கின்றன. தென்றலின் மென்சுகத்தில் திளைக்கும் கவிஞர்

இது பிறந்த மலை எங்கள் தமிழகமே

எனும்போது சிலிர்க்கும் உள்ளம்

எனத் தென்றலுக்கும் தனக்கும் உள்ள உறவை எண்ணி மேலும் மகிழ்வெய்துகிறார். தென்றல் மகிழ்விப்பதையும் வாடை வாட்டுவதையும் எண்ணுங்கால் வடக்கிருந்து வருபவையால் (குறிப்பாக இந்தியால், வடமொழியால்) துயருழந்து வாடுவதையும் தெற்கு இன்பம் படைப்பதையும் எண்ணி மகிழ்கிறார்.

  ஆற்றின் இயக்கம், சார்பற்றுத் தனித் தியங்கவல்ல தமிழ்மொழியில் பிறமொழிகள் கலந்தபோதும் நேர்வுற்று மாசின்றி இயங்கும் பண்பை மட்டும் கவிஞருக்கு நினைப்பூட்டவில்லை. கரையெழுப்பிய கரிகாலனையும் ஆட்டணத்தி வரலாற்றையும் ஏட்டுச்செல்வம் அழித்தொழித்த பதினெட்டாம் பெருக்கையும் நினைப்பூட்டுகிறது. கடலோவெனின் யாதும் ஊர், பிறரெல்லாம் கேளிர் என்ற பற்றுடைய தமிழினத்தார் பரந்த மனப்பான்மையை நினைப்பூட்டுகிறது. சகமெல்லாம் போற்றும் சங்க இலக்கியங்களை அழித்து, புகாரையும் அழித்து இன்று சிங்கநிகர் பன்னீர்ச்செல்வத்தையும் செத்தொழியச் செய்த கடல் நாகையினையும் தரங்கம்பாடியையும் தன் அலைக்கையால் அழிக்கழிக்கிறது. நம் முன்னோர் நெய்த னலெனப் பெயர் சூட்டி, ” இரங்கல் உரிப்பொருளாம் என உரிமைப் பொருளும் தந்ததனால் அழித்தழித்து நம்மை இரங்கச் செய்கிறது என நயத்தோடு கூறுகிறார்.

  தமிழ்நாட்டில் தமிழ்த்தெருவில் தமிழ்தானில்லை. கோவில்களிலும் வேறேதோ மொழி வழங்குகிறது. எனவே,

… தமிழ்நாடும் கோவில்மன்றும்

நாதியற்ற சொத்தோ? உம் சொந்தமன்றோ?

சென்றந்த உரிமைபெற வீரம் இல்லை?

இவ்வினா தமிழ் வழங்காக் கோவிலுள்ளே தலைகாட்டேன் என்று கூறிவிட்டுக் கோயிலிலிருந்து வடமொழியை நீக்க வகை செய்யாது கடமையைத் தட்டிக் கழிக்கும் வீரர்க்கு ஒரு சாட்டையடி! கவிஞன் இருளில் வாழும் தன் தனிமைத் துயரைக் களைதற்குப் பாடும் ஒரு கருங்குயில் எனச் செல்லி(Poet Shelly) கூறுகிறான். சாதிச் சழக்காற்றினால், செல்வ வேறுபாட்டால் ஏற்றத்தாழ்வு பெற்றிருக்கும் இருளடைந்த மன்பதையில் ஒருவர்தான் முடியரசன். அவரது பாவெங்கும் பொதுவுடைமை இயக்கமே தலைதூக்கி நிற்கிறது.

  அரைவயிறு மட்டும் உண்டு இளைப்பாறும் உழைப்பாளியின் சிறு குடிசைமீதும், பெருவயிற்றுப் பணக்காரன் மாடமீதும், வேறுபாடின்றி ஒளிவீசும் நிலவு ஒன்றே கவிஞருக்குப் பொதுவுடைமை ஆட்சியின் மாண்பினைக் காட்டுகிறது. அவரது கவிதைகளின் தொகுதியில் தொழில் ‘உலகு’ என்னும் பகுதியில் அவரது புரட்சிக் கருத்துகள் இடம் பெறுகின்றன. வளமிக்க நாடெனக் கூறப்படும் இந்த நாட்டில் வாழ ஒரு வழியின்ற வறுமைதன்னால் உளம்நொந்து கூலிகளாய்ச் செல்லுகின்றார் ஒப்பற்ற தமிழினத்தார். இந்நிலை பொறுக்காது,

விதி விதி என்று மக்கள்

வீணினில் மாய்ந்து சூழ்ச்சிச்

சதியினில் சிக்கி அந்தோ!

சாய்ந்திடும் நிலைமை கண்டும்

மதியொரு சிறிது மின்றி

மாற்றிட மனமு மின்றி

வதிவது நன்றோ ?நாட்டீர்!

வளமிகக் காண்போம் வாரீர்!

என அறைகூவல் விடுக்கின்றார் கவிஞர்.

  வீரம் மிக்க தமிழ் மறவரே! இலங்கை, பருமா, நாட்டோர், கிழங்கென்றும் கீரையென்றும் எண்ணி நம்மைக் கீழாக்கிவிட்ட இந்த நிலை ஒழிக்கக் களங்காண வாரீர்! கவியரசர் தலைமையிற் படை திரள்போம் வாரீர்! மொழி காக்க, இனங் காக்க வாரீர்! வாரீர்!

-முனைவர் மறைமலை இலக்குவனார்

மாணவப்பருவத்தில் எழுதிய கட்டுரை

குறள்நெறி  தை 02, 1996 / 15.01.65

(அகரமுதல95,ஆவணி 20, 2046 / செப்.06, 2015 தொடர்ச்சி)

தமிழ்நலப் பகுத்தறிவுக் கவிஞர் பேராசிரியர் சி.இலக்குவனார் – 3: இலக்குவனார் திருவள்ளுவன்

இலக்குவனார் திருவள்ளுவன்      06 September 2015      No Comment

(அகரமுதல 94, ஆவணி 13, 2046 / ஆக.30, 2015 தொடர்ச்சி)

 

      பேராசிரியர் சி.இலக்குவனார் அவர்களின் மற்றொரு குறிப்பிடத்தக்க பாடல் படைப்பு அவரின் ‘துரத்தப்பட்டேன் என்னும்’ உள்ளக் குமுறலாகும். நம் நாடு சிறந்த மக்களாட்சி நாடாக விவரிக்கப்பட்டு வந்தாலும் உள்ளபடியே பல உரிமைகள் ஏட்டளவோடு நின்று நடைமுறையில் மறுக்கப்படுவனவாகவே உள்ளன. இதற்கொரு சான்றே, பேராசிரியர் சி.இலக்குவனார் அவர்கள், தம் கல்லூரிப் பணியைச் சிறப்பாகச் செய்திருந்தாலும், சாதிக் கண்ணோட்டத்தால் வேலைவாய்ப்பை இழந்தது ஆகும். விருதுநகர்ச் செந்திற்குமார இந்து நாடார் கல்லூரியில் பேராசிரியர் அவர்கள், தமிழ்த்துறைத் தலைவராகவும் துணை முதல்வராகவும் பணியாற்றிக் கொண்டிருந்த பொழுது நடைபெற்ற பொதுத் தேர்தலில் அறிவியல் அறிஞர் கோ.து.(நாயுடு) அவர்கள். நாடாளுமன்றத்திற்கு உறுப்பினராக அனுப்பப்படுவது நாட்டு வளத்திற்கு ஏற்றதென எண்ணி அவருக்குச் சார்பாகப் பரப்புரை மேற்கொண்டார். அவரை எதிர்த்த கருமவீரர் காமராசர் தமிழ் நாட்டை ஆளுவது நமக்கு நல்லதெனக் கூறி அவரை எதிர்த்து வேறு எதுவும் கூறினாரல்லர். இறுதியில் தேர்தலில் கருமவீரரே வெற்றி பெற்றாலும், நாடார் கல்லூரியில் பணியாற்றிக் கொண்டு நாடாரை எதிர்த்தே பேசுவதா எனச் சாதிக் கண்ணோட்டத்துடன் கூறிப் பேராசிரியரைப் பணிநீக்கம் செய்தனர். ஆனால், கருமவீரரை எதிர்த்துப் பரப்புரை மேற்கொண்ட கல்லூரிச் செயலரை – அவர் நாடார் வகுப்பைச் சேர்ந்தவர் என்பதால் – ஒன்றும் செய்யவில்லை. கல்லூரி தோற்றுவிக்கப்படும் பொழுது அதன் வளர்ச்சிக்குத் தேவை என அழைக்கப்பட்ட தமிழறிஞரை அவரது பணியால் சிறப்பு பெற்ற கல்லூரி நிருவாகம் சாதிக்கட்டால் நீதிக் கண்களை மறைத்துக் கொண்டு இவ்வநீதியை இழைத்தது. கல்லூரி மாணாக்கர்கள் மட்டுமின்றி ஊர் மக்கள் அனைவருமே திரண்டு எதிர்த்த போதும் சாதிச் செருக்கால் முடிவை மாற்றிக் கொள்ளவில்லை.’எத்தகு இன்னல் நேரினும் தமிழ்ப் பணியாற்றுவதற்கு அஞ்சமாட்டேன்’ என்னும் உறுதிப்பாடு கொண்ட பேராசிரியர் அவர்கள், மன்பதைச் சூழலை நொந்த உள்ளத்துடன் விளக்குவதுதான் ‘துரத்தப்பட்டேன்’ என்னும் கவிதைப் படைப்பு. மரபுவழிச் செய்யுளாயினும் புதுக்கவிதை மரபையும் இதில் காண இயலும்.

      ‘‘சாதிகள் ஒழியச் சமரிடும் நாளில்

      சாதிகள் பேரால் வாதிட வந்தனர்”

எனத் ‘துரத்தப்பட்டேன்’ பாநூலில் கவலைப்பட்டு,

      ‘‘உரிமை என்பதும் ஓர் குலம் என்பதும்

      வெற்றுரை என்பதை விளக்கி விட்டனர்

      சாதிகள் வேண்டா என்றே சாற்றி

      சாதிகள் நலனே தன்நலன் ஆகக்

      கடமைகள் ஆற்றும் கயமை ஈங்கு

      என்று நீங்குமோ இருநிலம் உய்யவே”

எனக் கவலைப்படும் செந்தமிழ்ச்செம்மல் பேராசிரியர் சி.இலக்குவனார் அவர்கள்,

      ‘‘சாதிப் பற்றே தழைத்துப் படரும்

      மக்களைப் பிரித்து வன்முறை செழிக்க

      அறநெறி கோடி அல்லது புரியும்

      சாதிமுறைகள் சாகும் நாள் என்றோ”

எனக் ‘‘கருஞ்சட்டை என்பர்” என்னும் கவிதையிலும், இக்கவலையைப் புலப்படுத்தியுள்ளார். திராவிட ஆட்சிகள் தொடர்ந்தாலும் போலித் திராவிடமும் புகுந்தமையால், பேராசிரியர் ஏக்கம் இன்றும் தீரவில்லை. இதற்குத் தீர்வு,

‘‘நல்லறம் கொன்று நாட்டைக் கெடுத்து

அல்லது புரிந்துஅடிமையாகித்

தம்மினம்மறந்து தாழ்வுற்றழிவரா?

அன்றே! அவருரை கேண்மின்!”

எனப் பெரியார் வழிநிற்பதுதான் என்று அன்றே அவர் கூறியதை இன்றாவது நாம் பின்பற்றினால் நாளைய உலகாவது நன்கு விடியும்.

(தொடரும்)

– இலக்குவனார் திருவள்ளுவன்

(அகரமுதல95,ஆவணி 20, 2046 / செப்.06, 2015 தொடர்ச்சி)

மனங்கவர்ந்த செந்தமிழ் மாமணி சி.இலக்குவனார் – பட்டுக்கோட்டை குமாரவேல்

இலக்குவர் திருவள்ளுவன்      30 August 2015      No Comment

மனங்கவர்ந்த செந்தமிழ் மாமணி

பேராசிரியர் சி.இலக்குவனார்

                என் மனம் கவர்ந்த ஆன்றோர்களில் முதன்மையானவர் செந்தமிழ்மாமணி பேராசிரியர் சி.இலக்குவனார் ஆவார். அவரை நான் முதலில் சந்தித்த பொழுதே அவரது உருவம் என் உள்ளத்தில் நன்கு பதிந்து விட்டது. அவரது கருத்துகளும் செயல்களும் எனக்கு உந்து சக்தியாய் விளங்கி என் முயற்சிகளில் நான் வெற்றி பெறச் செய்து விட்டது. என் முன்னோடி அறிஞர் ஆன்றோர் முனைவர் பேராசிரியர் சி.இலக்குவனார் அவர்களைப் பற்றிய எண்ணத்தைப் பகிர்ந்து கொள்வதில் நான் பெருமிதம் கொள்கிறேன்.

                இன்றைக்கு 35 ஆண்டுகளுக்கு முன்னர் ஒரு நாள், நான் திருச்சி வானொலி நிலையத்தில் பணியாற்றிக் கொண்டிருந்த பொழுது, ஒருவர் பேராசிரியர் வானொலி நிலையத்திற்கு வந்திருக்கிறார் என்று சொன்னார். தமிழ்கூறும் நல்லுலகில் அன்றைக்குப் பேராசிரியர் என்றால் அது தமிழ்மலை செந்தமிழ்மாமணி பேராசிரியர் சி.இலக்குவனார் மட்டும்தான். “நம் மாவட்டத்தைச் சேர்ந்தவர்; தமிழ் உலகிற்கேச் சொந்தக்காரர் ஆனவர். தமிழ்ப்பணிக்காகப் பதவிகளையே தூக்கி எறிந்த புரட்சியாளர். தமிழ் நலன் ஒன்றையே தன் நலனாகக் கருதியவர். இத் தமிழ்ச் சான்றோரைச் சந்திக்கும் வாய்ப்பு கிட்டுமா?” என ஏங்கியவன் நான். படிக்கும் பொழுதே படைப்பாளியாகத் திகழ்ந்த அவரைப்பற்றிய எண்ணமே பின்னர் என்னை ஆயிரக்கணக்கான படைப்புகளுக்குச் சொந்தக்காரர் ஆக்கியது எனில் மிகையாகாது. அத்தகைய பெருந்தகையாளர் வந்திருக்கிறார் என்றால் அவரை எப்படிச் சந்திக்காமல் இருக்க முடியும்?

          ஆட்சி மாற்றத்திற்கே நெம்புகோலாய்த் திகழ்ந்த புரட்சிப் பேராசிரியரைத் தயக்கத்துடனும் ஆர்வத்துடனும் சந்திக்கச் சென்றேன். ஆனால், சந்தித்த பின்பு ஏதோ மிக நெருங்கிய உறவினரைப் போன்றும் நீண்டகால நண்பரைப் போலவும் இனிமையாகப் பழகிய அவரது பண்பு என்னை இன்பத்தில் ஆழ்த்தி விட்டது.

                “உண்டாலம்ம இவ்வுலகம்” எனத் தொடங்கும் புறநானூற்றுப் பாடலுக்கு எடுத்துக் காட்டாக வாழ்ந்து தனக்கென வாழாத் தகைமையாளராகப் பிறர்க்கென வாழும் பெருந்தகையாளராகத் திகழ்ந்தவர்; எண்ணம், எழுத்து, பேச்சு, மூச்சு என யாவுமே தமிழாகக் கொண்டவர்.

                “தோன்றிற் புகழொடு தோன்றுக”என்னும் வள்ளுவர் வாய்மொழிக்கிணங்கத் தாம் தொடங்கிய செயல் யாவினும் புகழுற விளங்கியவர்.

                “சேமமுற வேண்டுமெனில் தெருவெல்லாம்

             தமிழ் முழக்கம் செழிக்கச் செய்வீர்”

என்னும் பாரதி வாக்கைச் செயல்படுத்தி, மாணவர்களைக் கொண்டும் தமிழ் ஆர்வலர்களைக் கொண்டும் தாம் பணியாற்றிய நகர்களில் எல்லாம், ‘தமிழில் பேசுக! தமிழில் எழுதுக! தமிழில் பெயரிடுக! தமிழில் பயிலுக!’ எனத் தமிழ்முழக்க ஊர்வலங்களை நடத்தி மக்களிடையே தமிழ் ஆர்வத்தை வித்திட்டவர். பிற இயக்கங்கள் இவ்வாறு தமிழ்முழக்க ஊர்வலம் நடத்த முன்மாதிரியாகத் திகழ்ந்தவர்.

                “தமிழ்நாட்டின் தமிழ்த் தெருவில்தமிழ்தான் இல்லை” என வருந்திக்

              “கெடல் எங்கே தமிழின் நலம் அங்கெல்லாம்

                  தலையிட்டுக் கிளர்ச்சி செய்க”

என்னும் பாரதிதாசனின் தமிழியக்கக் கனவுகளைச் செயற்படுத்தும் தலைவராகத் தமிழ்க் காப்புக்கழகம் நிறுவியவர் பேராசிரியர். அரசியல் கட்சிகளும் இயக்கங்களும் செய்ய முடியாததைச் செய்து காட்டிய செம்மல் பேராசிரியர் சி.இலக்குவனார்.

          தொல்காப்பியர், திருவள்ளுவர், இளங்கோ அடிகள், ஒளவையார் முதலிய தமிழ்ப் பெரும்புலவர்கள் பெயரால் மக்கள் விழாக்களை நடத்தித் தமிழ் எழுச்சியை ஏற்படுத்தியவர். ஆசிரியப்பணி என்பது கல்விக்கூடங்களில் மட்டும் அல்லாமல் மக்களிடையேயும் ஆற்றுவது என்பதை எடுத்துக்காட்டிய ஏந்தலே பேராசிரியர் சி.இலக்குவனார் அவர்கள்.

            பிற ஆசிரியர்களுக்குக் கீழாக நடத்தப்பட்ட தமிழாசிரியர்களுக்குத் தம் வாதத் திறமையாலும் போராட்டச் செயல்களாலும், பிற ஆசிரியர்களுக்கு இணையான உரிமைகளைப் பெற்றுத் தந்த போராளி பேராசிரியர் சி.இலக்குவனார் அவர்கள்.

          மாணவர்கள் தங்கள் வருகையைப் பதிவு செய்ய “உள்ளேன் ஐயா” எனத் தமிழ் மணக்கக் கூறச்செய்தவர்; மாணவர்களிடம் தமிழ்ப்பற்றை ஊட்டிய முதல் போராட்ட அறிஞராகத் திகழ்ந்தவர் பேராசிரியர் சி.இலக்குவனார் அவர்கள் மட்டுமே. எனவேதான் இந்தி எதிர்ப்பு உணர்வு மாணவர்களிடையே பற்றி எரிந்தத் 1965இல் இந்தி எதிர்ப்புப் பேராட்டமாக வெடித்தத் காங்கிரசு ஆட்சி அகன்றது. இந்தி எதிர்ப்புப் போராட்டத்தை நிறுத்த மாணவர்களுக்கு வேண்டுகோள் விடுக்க வேண்டும் என்று அன்றைய காவல்துறையினர் அறிஞர் அண்ணா அவர்களிடம் வேண்டியபொழுது, “இதற்கான விசை மதுரையில் உள்ளது. மாணவர்கள் பேராசிரியர் இலக்குவனார் கட்டுப்பாட்டில் உள்ளனர்” எனக் கூறிப் பேராசிரியரின் தமிழ்க்காப்புப் புரட்சியை வெளிப்படச் செய்தார்.

                கலைஞர் முதலானோர் இன்று சங்கத் தமிழைப் பரப்புவதற்கு முன்னோடி வழிகாட்டியாக அன்று சங்கத் தமிழை மக்கள் தமிழாக மலரச் செய்தவர் பேராசிரியர் சி.இலக்குவனார் அவர்கள். கம்பரின் புகழைப்பாடிக் கன்னித் தமிழை வளர்ப்பவர்களாகக் காட்டிக் கொண்டு சங்கத் தமிழை அழிக்க எண்ணியவர்களுக்கு எரிமலையாகக் காட்சியளித்து அன்றைக்குப் பேராசிரியர் கிளர்ந்தெழுந்து போராடி இராவிட்டால், உ.வே.சா. போன்ற அறிஞர்கள் ஓலைச் சுவடியிலிருந்து அச்சுக்குக் கொணர்ந்து உயிர்ப்பித்த சங்கத் தமிழ் மறைந்தே போயிருந்திருக்கும்.

       வையாபுரிக் கூட்டங்கள், தமிழ் இலக்கியங்களின் தொன்மையை மறைத்து ஆரியத்திற்குப் பூசை செய்த பொழுது வரலாற்று நோக்கிலும் அறிவியல் பூர்வமாகவும் தமிழ் இலக்கியங்களின் தொன்மையை உணரச் செய்தவர்களில் முதன்மையானவரும் பேராசிரியர் சி.இலக்குவனார் அவர்களே ஆவார்.

           தொல்காப்பியத்தின் சிறப்பையும் அது வெளிப்படுத்தும் தமிழ் வரலாற்றுப் பண்பாட்டுச் சிறப்பையும் தான் புலவர் படிப்பு பயிலும் பொழுதே உலகிற்கு உணர்த்திய பேராசிரியர் சி.இலக்குவனார் அவர்கள் அதனை எளிமையாக மாணவர்களுக்கும் மக்களுக்கும் விளக்கிப் பெருந் தொண்டாற்றியதுடன் ஆங்கிலத்திலும் மொழிபெயர்த்து உயர்தனிச் செம்மொழியின் பெருமையை உலகுணரச் செய்துள்ளார்.

            இலக்கிய இலக்கண வகுப்புகளைப் பொதுமக்களுக்காக நடத்தித் தமிழ் இலக்கியங்களை எளிமையாகப் புரியச் செய்ததுடன் எண்ணற்றோர் புலவர் பட்டமும் தமிழ் முதுகலைப் பட்டங்களும் பெற்று இதன் தொடர்ச்சியாகப் பல உயர் பதவிகளில் அமரக் காரணமாக இருந்த மக்கள் பேராசிரியர் தமிழ்மலை இலக்கணச் செம்மல் சி.இலக்குவனார் அவர்கள் மட்டுமே!

        மறைமலைஅடிகளின் தனித்தமிழ்ப் பணிகளை உரைநடையில் பலர் பின்பற்றிய பொழுது, படிக்கும் காலத்திலேயே ‘எழிலரசி’ என்னும் தனித்தமிழ்ப் பாவியத்தை முதலில் படைத்தவர் தமிழ்க்காப்புத் தலைவர் பேராசிரியர் சி.இலக்குவனார் அவர்களே ஆவார். பாவேந்தர் பாரதிதாசனின் தனித்தமிழ்ப் படைப்புகளுக்கு முன்னோடியாக முதலில் தனித்தமிழ்ப் பாவியம் படைத்த சிறப்பிற்குரியவர் பேராசிரியர் சி.இலக்குவனார் என்பதைத் தமிழுலகம் இன்னும் உணரவில்லை. எழுத்துலகில் தொடர்ந்து இருந்தால் எண்ணற்ற பரிசுகள் அவரைத் தேடி வந்திருக்கும். ஆனால், மக்களுக்காக எழுதி, மக்களுக்காகப் பேசி, மக்களுக்காகத் தொண்டாற்றி மறைந்த மக்கள் அறிஞராக அவர் வாழ்ந்ததால் படைப்புலகம் அவரைப் புரிந்து கொள்ளாமல் போய்விட்டது.

         தமிழறிஞர்களின் படைப்புகள் உலக அறிஞர்களின் பார்வைக்குச் செல்லுமேல், பல தமிழறிஞர்கள் நோபள் பரிசு பெற்றிருப்பர். அத்தகைய நோபள் பரிசிற்குரிய தகுதியாளர்தாம் முத்தமிழ்க் காவலர் தமிழ்ப் படைத் தளபதி பேராசிரியர் முனைவர் சி.இலக்குவனார் ஆவார்.

        பேராசிரியரின் சங்கத் தமிழ்க்காப்புப்பணிக்காக, திருக்குறள் ஆராய்ச்சிப் பணிக்காக, தொல்காப்பியப் புலமைக்காக, மொழிப்போர் பணிக்காக, இதழ்வழித் தமிழ்ப்பரப்புப் பணிக்காக என எத்தனையோ உலகப் பரிசுகள் அவரைத் தேடிவந்திருக்க வேண்டும்.

          தமிழ்க்காப்புத் தளபதியாகத் திகழ்ந்ததாலும், தமிழ் உரிமைப்பெருநடைப் பயணத்திற்கு ஆயத்தமானதாலும் வெங்கொடுமைச் சிறையில் தள்ளப்பட்டார் பேராசிரியர் சி.இலக்குவனார் அவர்கள். அப்பொழுது, ‘தமிழ்த்தாய் சிறையில்’ உள்ளதாகக் கூறித் தமிழ்  நெஞ்சங்கள் கவலைப்பட்டன.  உலகில் மொழிக்காகச்சிறை சென்ற  முதல் பேராசிரியர் பேராசிரியர் சி.இலக்குவனார் நினைவாக மணிமண்டபம் அமைத்தல், பல்கலைக்கழகம் ஒன்றிற்கு அவர் பெயரைச் சூட்டல், பேராசிரியர் இலக்குவனார் பெயரில் உலகளாவிய விருதுகளை வழங்குதல், நடுவணரசு சார்பில் வழங்க உள்ள தொல்காப்பிய விருதைப் பேராசிரியர் சி.இலக்குவனாருக்கு இறப்பிற்குப் பின்னதாக வழங்கி அவர் நினைவைப் போற்றுதல் முதலியனவற்றைத் தமிழக அரசும் இந்திய அரசும் ஆற்ற வேண்டும்.

– நாடகச் செம்மல் பட்டுக்கோட்டை குமாரவேல்

(2006)

அகரமுதல 94 ஆவணி 13, 2046 / ஆக.30, 2015